Basahin at unawain
Ang Florante at Laura ay isinulat ni Francisco Balagtas Baltazar noong 1838, panahon ng pananakop ng mga Espanyol sa bansa. Sa panahong ito, mahigpit ang ipinapatupad na sensura kaya’t ipinagbawal ang mga babasahin at palabas na tumutuligsa sa pagmamalabis at kalupitan ng mga Espanyol. Dahil sa pagkontrol ng mga Espanyol, ang mga aklat na nalimbag ay karaniwang patungkol sa relihiyon, labanan ng Kristiyano at Moro na tinatawag ding komedya at moro-mora, na siyang temang ginamit ni Balagtas sa kanyang awit. Ito ang dahilan kaya’t nagtagumpay siyang mailusot ang kanyang akda sa mahigpit na sensura ng mga Espanyol. Gumamit siya ng alegorya kung saan masasalamin ang mga nakatagong mensahe at simbolismong kakikitaan ng pagtuligsa sa pagmamalabis at kalupitan ng mga Espanyol gayundin ng pailalim na diwa ng nasyonalismo. Ayon kay Lope K. Santas masasalamin sa akda ang apat na himagsik na naghari sa puso at isipan ni Balagtas (1) ang himagsik laban sa malupit na pamahalaan: (2) ang himagsik laban sa hidwaang pananampalataya: (3) ang himagsik laban sa mga maling kaugalian: at (4) ang himagsik laban sa mababang uri ng panitikan. Ang awit ay nagsisilbing gabay at nagturo sa mga Pilipino ng maraming bagay. Ito ay naglalaman ng mahahalagang aral sa buhay tulad ng wastong pagpapalaki sa anak pagiging mabuting magulang, pagmamahal at pagmamalasakit sa bayan, pag-ingat laban sa mga taong mapagpanggap o mapagkunwari at makasarili, gayundin ang pagpapaalala sa madla na maging maingat sa pagpili ng pinuno sapagkat napakalaki ng panganib na dulot sa bayan ng pinunong sakim at mapaghangad sa yaman. Ipinakita rin sa akda ang kahalagahan ng pagtulong sa kapwa maging doon sa may magkakaibang relihiyon tulad ng mga Muslim at Kristiyano.
Gawain sa Pagkatuto Bilang 2: Sagutin ang mga sumusunod na tanong batay sa binasang kaligirang kasaysayan Florante at Laura.
1. Ano ang kalagayan ng bansa sa panahong isinulat ni Balagtas ang awit na Florante at Laura?
2. Ano ang naging layunin ni Balagtas sa pagsulat niya ng kanyang akda?
3. Bakit mahalagang basahin at pag-aralan ang Florante at Laura?
4. Suriin ang naging epekto nito sa mga Pilipinong nakabasa sa panahong naisulat ito?
5. Batay sa binasa mong kaligirang pangkasaysayan, nagkaroon kaya ng impluwensiya ang Florante at Laura sa mga nangyaring pag-aalsa ng mga Pilipino laban sa pamahalaang Kolonya? ipaliwanag.
Answer:
1. Ang bansa ay nasa panahon ng pananakop ng mga Espanyol sa panahong isinulat ni Balagtas ang awit na Florante at Laura. Mahigpit ang ipinapatupad na sensura kaya’t ipinagbawal ang mga babasahin at palabas na tumutuligsa sa pagmamalabis at kalupitan ng mga Espanyol.
2. Ang layunin ni Balagtas sa pagsulat ng kanyang akda ay upang magbigay ng pag-asa at inspirasyon sa mga Pilipino na labanan ang mga pang-aabuso at kalupitan ng mga Espanyol. Gumamit siya ng alegorya at simbolismo upang maiparating ang kanyang mensahe nang hindi siya mahuli ng mga Espanyol.
3. Mahalagang basahin at pag-aralan ang Florante at Laura dahil ito ay naglalaman ng mga mahahalagang aral sa buhay at nagsisilbing gabay sa mga Pilipino sa panahon ng pananakop ng mga Espanyol. Ito ay nagtuturo ng pagmamahal sa bayan, pagiging maingat sa pagpili ng pinuno, pagiging mabuting magulang at pagtitiwala sa sarili.
4. Ang Florante at Laura ay naging isang malaking inspirasyon para sa mga Pilipinong nakabasa nito noong panahon ng pananakop ng mga Espanyol. Ito ay nagbigay ng pag-asa at nagpakita ng lakas ng loob sa mga Pilipino na lumaban para sa kanilang kalayaan at karapatan.
5. Oo, nagkaroon ng impluwensiya ang Florante at Laura sa mga nangyaring pag-aalsa ng mga Pilipino laban sa pamahalaang Kolonya. Ito ay nagbigay ng inspirasyon at lakas ng loob sa mga Pilipinong labanan ang mga pang-aabuso ng mga Espanyol at magpakita ng pagsasanay ng kanilang karapatang mabuhay ng malaya.
